Ricercje test
__storic

Ricercje test
__coordenât

Vuide pe
__ricercje

LexView - Vuide pe ricercje

Test storic e test coordenât - Ricercje semplice

Test storic e test coordenât - Ricercje par esperts

Ricercje Booleane

La schermade di Ricercje par esperts e permet di fâ une ricercje su lis bancjis dâts des leçs regjonâls.
Si pues fâ une ricercje tal stes timp di une leç, di un articul di leç e di peraulis clâf, si podarà cun di plui impostâ la visualizazion de leç cui riferiments privilegjâts, no privilegjâts o di visualizâ la leç cence nissun gjenar di riferiment.
I dâts a saran metûts in AND, otignint di staronzâ la ricercje tra i documents de bancje dâts. Plui indevant a son descritis chestis modalitâts di ricercje.

Dâts de leç

La ricercje si pues fâle scrivint i dâts de leç che si vûl tai diviers cjamps previodûts che a son:
- l'an de leç;
- il numar de leç;
- l'articul de leç,
- eventuâl articul subordenât (bis, ter,…).

Diviers che te ricercje semplice, te ricercje par esperts si pues ancje impostâ un interval di ricercje e duncje recuperâ dutis lis leçs cjapadis dentri tra une leç di un ciert an e une altre di daspò.
Si à di meti i dâts dentri tai cjamps formatâts “Dâts essenziâi de leç” daûr di une struture jerarchiche. Par esempli si pues meti l’an e il numar de leç, ma no l’an e l’articul cence specificâ il numar de leç.

Intal cuadri de ricercje par dâts de leç, tal câs che si sedi daûr a fâ une ricercje te bancje dâts dal test storic, al comparirà il menù a tindine che al darà la pussibilitât di selezionâ, in plui de vôs test storic, la vôs articui zontâts.
Selezionant cheste vôs si recuperaran ducj i articui zontâts di une cierte leç o di un ciert interval.
Sot tal cuadri dai dâts de leç al è un panel li che si pues impostâ il gjenar di ricercje che si vûl fâ.
Dopo di vê impostât une leç, ma no un interval, si podarà selezionâ une ricercje compagne, plui grande, plui piçule e v.i..

Ricercje par peraulis

In plui de ricercje par dâts de leç si podarà ancje fâ une ricercje par peraulis, di fate booleane.
Pal so funzionament criche chi.
Inte ricercje par peraulis si podarà ancje decidi se fâ la interogazion sul cjamp titul o sul cjamp test dal articul selezionant la casele specifiche.

Riferiments

Tant che ultime funzionalitât de ricercje par esperts, si pues ancje impostâ il gjenar di riferiments par visualizâ la leç cirude.
Si podarà visualizâ la leç cui riferiments privilegjâts o cence nissun gjenar di riferiment selezionant une des caselis specifichis.

Te ricercje booleane si pues fâ une interogazion scrivint dome une peraule o ben scrivint plui peraulis peadis tra lôr midiant di operadôrs booleans (AND, OR,-), o ben midiant di operadôrs di adiacence (ADJ, NEAR). Par esempli, si podarà scrivi une striche cun cheste struture

edilizia AND ((scolastica OR residenziale) OR pubblica)

Cuntune domande cun cheste struture si podarà cjatâ ducj i documents che a tratin di "costruzions" "publichis" o "scolastichis" o ben "residenziâls". Se si è daûr a cirî plui di dôs peraulis, nol covente sierâlis in cubie jenfri parentesis tarondis, stant che al è clâr che in chest câs l'operadôr AND al ven prime dal operadôr OR. Ven a stâi i risultâts di une domande fate in chest mût:

commercio AND industria OR artigianato

a coincidin cui risultâts de domande:

(commercio AND industria) OR artigianato

Se si vûl dâ une prioritât divierse ai operadôrs booleans, si scuen doprâ lis parentesis. Alore il risultât de domande pandude cussì:

commercio AND (industria OR artigianato)

al sarà une vore diferent di chê di prime. Intune ricercje al pues jessi util specificâ che dôs peraulis a àn di comparî tal test une dongje di chê altre.Considerìn la ricercje fate cu lis peraulis:

forze AND armate

Cheste ricercje e sarà sodisfate se lis dôs peraulis si cjatin tal document, in cualsisei posizion, La ricercje e sarès sodisfate ancje tal câs che lis dôs peraulis si cjatassin in frasis diferentis dal test. Chest al podarès sedi un svantaç cuant che si vûl cirî locuzions sul stamp di "lavôrs publics" o "Consei regjonâl". Midiant dai operadôrs ADJ, NEAR si pues specificâ se dôs o plui peraulis a àn di jessi cirudis tant che vicinis.
Plui in detai, l'operadôr ADJ al permet di ricercjâ peraulis che a son une daûr di chê altre dentri dal test cuntun ordin determinât; l'operadôr NEAR, invezit, lis cjate cence riferiment al ordin.
Daspò di ducj i doi i operadôrs al va simpri un numar tra 1 e 9, che al pant la distance, intindude tant che numar massim di peraulis framieç, tra lis peraulis che a son tal test.
Par esempli, la espression "orghins di informazion, e pues sei cirude dant dongje la domande in chest mût:

organi ADJ2 informazione

La striche:

musica NEAR3 danza

e permetarà invezit di viodi i documents che a cjapin dentri i tiermins "musiche" e "danze", lontans tra di lôr no plui di trê peraulis un di chel altri. La ricercje e larès a finî ben ancje se la peraule "danze" e ves di comparî prime de peraule "musiche", o ben se lis peraulis a vessin di partignî a dôs frasis diviersis.
Al è aromai clâr che la locuzion "lavôrs publics" e va cirude in chest mût:

lavori ADJ1 pubblici

In mût diferent dai operadôrs booleans, la associazion tra plui operadôrs di adiacence e je cence significât.
Il dineament di une peraule si lu oten midiant dal operadôr "-" e al permet di cirî ducj i documents li che la peraule dineade no je. Par esempli la striche

agricoltura AND -foreste

e cjate i documents che a cjapin dentri la peraule "agriculture" ma no "boscs".
Si pues, par finî, fâ ricercjis cun clâfs cjonçadis scrivint la lidrîs de peraule e daspò il caratar "$". Daûr di une domande cussì dade dongje

finanzia$

a vignaran selezionâts ducj i documents che a cjapin dentri la lidrîs "finanzia"; par esempli i documents che a cjapin dentri lis peraulis "finanziarie", "finanziariis", "finanziari", "finanziaments", "finanziament", etc…