Legge regionale 27 marzo 2015 , n. 6 - TESTO VIGENTE dal 13/08/2016

Istituzione della “Fieste de Patrie dal Friûl” - Istituzion de “Fieste de Patrie dal Friûl”.

Art. 1

(Istituzion de "Fieste de Patrie dal Friûl")

1. Cul fin di ricuardâ e valorizâ lis origjins, la culture e la storie di autonomie dal popul furlan, cun cheste leç e je istituide la "Fieste de Patrie dal Friûl" te zornade dai 3 di Avrîl, inovâl de istituzion dal Stât dal patriarcjât di Aquilee.

Art. 2

(Bandiere dal Friûl)

1. Daspò dal come 1 dal articul 6 de leç regjonâl dai 27 di Novembar dal 2001, n. 27 (Adozion de bandiere de Regjon Friûl-Vignesie Julie, disposizions pal so ûs e esposizion, e ancje par chês de Republiche taliane e de Union europeane), al è zontât:

<<1 bis. La bandiere de comunitât furlane e je formade di un drap di forme retangolâr cun tal mieç une acuile eraldiche di aur cu lis alis viertis, cjâf a çampe, bec viert e sgrifis rossis, su sfont celest. Il steme al à dimensions compagnis a trê cuints de altece de bandiere che e à di jessi alte doi tierçs de sô lungjece.>>.

Art. 3

(Esposizion de bandiere)

1. Daûr dal articul 6 de leç regjonâl 27/2001 , i ents locâi e i uficis de Regjon a puedin esponi fûr des lôr sedis, in ocasion de "Fieste de Patrie dal Friûl", la bandiere dal Friûl.

2. In ocasion de prime metude in vore, la Aministrazion regjonâl e je autorizade a dâ fûr in maniere gratuite ai ents locâi che le domandin une bandiere dal Friûl pe esposizion esterne.

Art. 4

(Celebrazions istituzionâls)

1. Il Consei regjonâl al organize ogni an la "Fieste de Patrie dal Friûl" cuntune cerimonie publiche di ricognossiment di personis, ents o organisims che si distinguin pe continuitât cui valôrs civîi e culturâi che a àn caraterizât la identitât furlane.

2. I Comuns a puedin adatâ i statûts comunâi cu lis finalitâts di cheste leç previodint cemût celebrâ la ricorence, cun atenzion particolâr aes ativitâts, organizadis cu lis scuelis, par cjapâ dentri e sensibilizâ i zovins aes tematichis de autonomie e des identitâts.

3. Cul fin di concretizâ lis ativitâts scolastichis dal come 2, lis scuelis di ogni ordin e grât a puedin individuâ percors didatics di pueste che a sperimentin gnovis formulis di progjetazion, organizazion e distribuzion dai risultâts ancje par mieç di colaborazions slargjadis, ativant rêts teritoriâls e par mieç des gnovis tecnologjiis mediatichis.

Art. 5

(Borsis di studi)

1. Te suaze de celebrazion nomenade tal articul 4, come 1, l'Ufici di Presidence dal Consei regjonâl al pues, cun di plui, istituî une o plui borsis di studi a pro dai students dal Friûl Vignesie Julie, che si son distints par merit scolastic e pe elaborazion di un studi su tematichis leadis ae autonomie, ae lenghe, ae storie e aes prospetivis di disvilup des comunitâts furlanis.

(1)

2. Lis Aministrazions comunâls a puedin organizâ iniziativis compagnis, cun fonts propris, te suaze des iniziativis nomenadis tal articul 4, come 2.

3. Lis iniziativis dai comis 1 e 2 a son slargjadis ancje ai fîs dai coregjonâi tal forest cul fin di permetiur di mantignî e rinfuarcî il leam cul teritori di origjin, ancje in colaborazion cui ents, lis associazions e lis istituzions ricognossudis daûr de leç regjonâl dai 26 di Fevrâr dal 2002, n. 7 (Gnove dissipline dai intervents regjonâi in materie di coregjonâi tal forest e rimpatriâts).

4. Cul fin di promovi la cussience di apartignî aes istituzions e ae vite aministrative de Regjon, al conferiment des borsis di studi dai comis 1 e 2 si zontin iniziativis par cjapâ dentri i students che a àn partecipât ae selezion, ae vite istituzionâl de Aministrazion regjonâl e dai ents locâi, e ancje ativitâts di informazion e di contat cui struments culturâi e economics che a promovin il disvilup e i procès di integrazion europeane de Regjon.

Note:

Parole sostituite al comma 1 da art. 6, comma 77, lettera a), L. R. 14/2016

Art. 6

(Manifestazions culturâls)

(1)

1. Te suaze di un program anuâl di pueste, la ARLeF e sosten la realizazion di manifestazions culturâls pe celebrazion de fieste nomenade tal articul 1, di bande di ents locâi in colaborazion cu lis Pro loco e altris sogjet publics e privâts cence fins di vuadagn o cun finalitâts mutualistichis.

(2)

2. Il program previodût dal come 1 al è fat bon ogni an da Zonte regjonâl, su propueste de ARLeF, predisponude dentri dai 31 di Zenâr di ogni an, sintude la Assemblee di comunitât linguistiche nomenade tal articul 21 de leç regjonâl dai 12 di Dicembar dal 2014, n. 26 (Riordin dal sisteme Regjon-Autonomiis locâls tal Friûl Vignesie Julie. Ordenament des Unions teritoriâls intercomunâls e rialocazion di funzions aministrativis), e in colaborazion, fin cuant che a saran in vore, cu lis Provinciis di insediament dal grup linguistic furlan.

(3)

Note:

Il presente articolo ha effetto dall' 1 gennaio 2016, come stabilito dall'art. 9, comma 2, della presente legge.

Parole sostituite al comma 1 da art. 6, comma 77, lettera b), L. R. 14/2016

Parole sostituite al comma 2 da art. 6, comma 77, lettera c), L. R. 14/2016

Art. 7

(Proviodiments di atuazion)

1. Cun delibare dal Ufici di Presidence dal Consei regjonâl si stabilissin:

a) lis modalitâts par individuâ i destinataris dal ricognossiment istituît daûr dal articul 4, come 1;

b) i recuisîts, lis modalitâts par fâ domande, la istrutorie e la assegnazion des borsis di studi nomenadis tal articul 5;

c) lis tematichis dai studis argoment de istrutorie par acedi aes borsis di studi nomenadis tal articul 5.

Art. 8

(Disposizions finanziariis)

1. Pes finalitâts previodudis dal articul 3, come 2, e je autorizade la spese di 10.000 euros pal an 2015 a valê su la unitât di belanç 5.4.1.5043 e dal cjapitul 300 di gnove istituzion tal stât di prevision de spese dal belanç plurienâl pai agns 2015-2017 e dal belanç pal an 2015, cu la denominazion <<Spesis par comprâ lis bandieris dal Friûl di dâ a gratis ai ents locâi in ocasion de prime metude in vore de istituzion de "Fieste de Patrie dal Friûl">>.

2. I coscj che a derivin di chel che al è disponût tal come 1 a vegnin cuvierts par mieç di un distradament dal stes impuart pal an 2015 de unitât di belanç 10.1.1.1161 e dal cjapitul 404 dal stât di prevision de spese dal belanç plurienâl pai agns 2015-2017 e dal belanç pal an 2015.

3. I coscj che a derivin des finalitâts previodudis dai articui 4 e 5 a son a caric dal belanç dal Consei regjonâl.

4. Pes finalitâts previodudis dal articul 6, come 1, e je autorizade la spese di 70.000 euros pal an 2016 a caric de unitât di belanç 5.4.1.5043 e dal cjapitul 302 di gnove istituzion tal stât di prevision de spese dal belanç plurienâl pai agns 2015-2017, cu la denominazion <<Trasferiment ae ARLeF a supuart dal program anuâl pe realizazion di manifestazions culturâls pe celebrazion de "Fieste de Patrie dal Friûl">>.

5. I coscj che a derivin di ce che al è disponût tal come 4 a vegnin cuvierts par mieç di un distradament dal stes impuart complessîf pal an 2016 di chestis unitâts di belanç e cjapitui dal stât di prevision de spese dal belanç plurienâl pai agns 2015-2017 pai impuarts scrits dongje di ognidun di lôr:

a) unitât di belanç 5.4.1.5043 - cjapitul 5543 - 50.000 euros;

b) unitât di belanç 1.3.1.5037 - cjapitul 9336 - 20.000 euros.

Art. 9

(Publicazion e jentrade in vore)

1. Il test di cheste leç al è publicât tal Boletin uficiâl de Regjon in lenghe taliane e furlane.

2. Cheste leç e jentre in vore la dì dopo de sô publicazion e l'articul 6 al à efiet dal 1n di Zenâr dal 2016.